الظلم وحش.. الحكاية الكاملة لبتر قدم الفنان شريف دسوقي
طمأنت الفنانة بدرية طلبة محبي وجمهور الفنان شريف دسوقي "سبعبع" بعد بتر قدمه من خلال منشور عبر حسابها الرسمي على موقع "الفيس بوك".
وكتبت "بدرية": "للناس اللى بتتصل وبتبعت رسايل علشان تطمن علي الفنان شريف دسوقى (سبعبع) كان فيه جرح فى رجله الشمال وهو مريض سكر حالته ساءت جدا وبعد الفحوصات والاشعه والتحاليل قرر الدكتور بتر الرجل من تحت الركبة وهو خرج من أوضة العمليات وحالته مستقرة الحمد الله أدعوله ربنا يتم شفاه علي خير".
وتعود أزمة شريف دسوقي أثناء تصويره فيلم "وقفة رجالة"، حيث ناشد نقابة المهن التمثيلية وقال: "اللي حصل وعشان ناس كتير اللي حصل إني أُصبت في رجلي أثناء تصوير أحد المسلسلات اللي مشوني منها، ويشهد على كده كل اللي بيتعاملوا معايا، اتصابت يومها بجرح صغير، ومكنتش أعرف إني عندي سكر، المهم روحت وجيت تاني يوم، حسيت بدوخة قولتلهم ودوني المستشفى أفاجئ إن ولا واحد من المسلسل معايا، باستثناء المنتج أحمد الجنايني وهو منتج فيلمي وقفة رجالة".
وتابع: "عملت تحاليل واكتشفت إني عندي سكر، وخبيت على الأستاذ أحمد الجنايني إني مصاب، عشان معطلش التصوير بتاع فيلم وقفة رجالة، الحمدلله نتاج تحملي ربنا كرمنا، خلصت الفيلم وداخل حاجات تانية".
وأردف: "فوجئت إن الدنيا كلها بتقول مشّوا شريف من المسلسلات عشان بيخش مخمور وسكران، أنا المتربي على مدرسة إسماعيل ياسين أنا مدرّب مادة التمثيل مستحيل أبقى نصاب، بطالب بحقي فقط لا غير إني أتعوض عن اللي حصل، أنا مخدتش تلت أجري ومش عيب أقول كدا".
واستغرب: "مصحة نفسية؟.. هي زيارة نفسية اللي روحتها وكانت من 20 سنة لما انفصلت عن زوجتي أم ابني، هو فيه حد لما ينفصل عن زوجته ينزل الشارع يرقص؟ .. أنا 40 سنة ببني نفسي بدراعي واشتغلت مع أكبر مخرجين مصر اسألهم شريف عامل إيه في اللوكيشن".
وأكمل: "ليه الموهوب واللي بينوّر في زماننا بيحاربوه؟ ليه احنا البلد اللي بتقتل الموهوبين الحقيقيين؟ أنا زعلت عشان حالتي كانت صعبة من 8 أشهر استشاريين كانوا يعيطوا وميقدروش يبصوا لرجلي النهاردة الحمدلله ربنا عافاني بعد فترة مقولتش لحد فيها حاجة بس من حقي أزعل لما اتكشف إعلاميًا غصب عني أنا مكنش عندي صداع أنا كنت مهدد فعلًا ببتر رجلي!".
واختتم رسالته: "عيب يتقال عليا إني روحت مصحة نفسية أو بدخل اللوكيشن سكران أنا بحضر قبل التصوير بساعتين وبقعد مع العمال نظبط الديكورات ونفطر مع بعض، الظلم وحش".
يذكر أن فيلم "وقفة رجالة" بطولة ماجد الكدواني وبيومي فؤاد وسيد رجب ومحمد سلام وشريف دسوقي وسوسن بدر وصفاء الطوخي وأمينة خليل ومحمد أوتاكا، وتأليف هيثم دبور، وإخراج أحمد الجندي.
جريدة الموجز، جريدة ورقية أسبوعية مستقلة، وموقع شامل يستطيع الجمهور من خلاله الوصول للخبر الصحيح والمعلومات الدقيقة.
ويقدم موقع الموجز للقراء كل ما يهم الشأن المصري الداخلي والخارجي بشكل يومي وعاجل، بالإضافة إلى أخر تحديثات أسعار الذهب ، أسعار العملات، أسعار الدولار، أسعار السلع أولاً بأول.
كما يقدم الموقع لقرائه أحدث وأهم أخبار الفن، وأخبار الرياضة، وأخبار السياسة، وأخبار الحوادث، وأخبار العالم ، وأهم الاحداث الكروية ، دوري أبطال أوروبا، ودوري أبطال آسيا، ودوري أبطال أفريقيا.