إيه السند الحلو ده!!.. الجمهور يشيد بـ شريف منير بعد دعمه لنجلته
أثار الفنان شريف منير جدل واسع ما بين مؤيد ومعارض له بعد الفيديو الذى نشره وعبر عن رأيه فيما فعلته نجلته أسما والهجوم الذي تعرضت له بعد حلاقة شعرها زيرو.
وجاءت التعليقات كالتالى : أنت أب جميل ، مش مهم هى عملت إيه المهم أنك فى صف بنتك "تفتكروا هاجى على بنتى علشانكم".. دى أكتر كلمة عفوية وصح ، ياربي إيه السند الحلو دا إيه الأب السوى دا وإيه كمية القوة والحب دى، جدع الأب يعنى السند والحماية.
ومنهم من أنتقد ظهورها بشكل غير لائق قائلا: موضوع شعرها وحلاقته دى مش مشكلتنا إحنا مشكلتنا فى العرى واللحم الرخيص
ونشر شريف منير مقطع فيديو عبر حسابه على انستجرام قال فيه: "مساء الخير، باكل سمك مشوي ورز أبيض، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته".
واستكمل:"تصرف عادي جدًا مفيهوش أي حاجة، إوعوا تفتكروا إني هاجي على بنتي عشان خاطر أكسب رضاكم.. دي بنتي اللي ماليش غيرها وبحبها".
وأوضح منير: بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم إنها متكونش بتأذي حد".
واستكمل: "قبل ما تتكلموا بصوا على نفسكو واتفرجوا على عيلتكو وعلى إخواتكو وعلى الناس اللي حواليكو قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا".
وكشف: "بحب آكل السمك والرز بإيدي حتى في المحلات الفخمة جدًا تفتكروا دي قلة أدب مني ولا مفيش إتيكيت؟ على العموم ريحو نفسكو واهدوا شوية؛ لإن اللي حصل من بنتي مش غلط ومش عيب هي مغلطتش في حد فيكو ومغلطتش في نفسها وبعدين بنتي عندها 36 سنة وأم وعندها بنوتة ومسئولة عن نفسها.. وأنا أب مسئول إني أحميها وهي حرة في تصرفاتها".
واختتم:"أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها،المهم إننا مش بنضر حد، سلام عليكم".
وأثارت أسما شريف منير الجدل بمجرد ظهورها في مهرجان القاهرة للدراما وهي حليقة الرأس بعد قيامها بحلاقة شعرها في مقطع فيديو على انستجرام.
جريدة الموجز، جريدة ورقية أسبوعية مستقلة، وموقع شامل يستطيع الجمهور من خلاله الوصول للخبر الصحيح والمعلومات الدقيقة.
ويقدم موقع الموجز للقراء كل ما يهم الشأن المصري الداخلي والخارجي بشكل يومي وعاجل، بالإضافة إلى أخر تحديثات أسعار الذهب ، أسعار العملات، أسعار الدولار، أسعار السلع أولاً بأول.
كما يقدم الموقع لقرائه أحدث وأهم أخبار الفن، وأخبار الرياضة، وأخبار السياسة، وأخبار الحوادث، وأخبار العالم ، وأهم الاحداث الكروية ، دوري أبطال أوروبا، ودوري أبطال آسيا، ودوري أبطال أفريقيا.
