رامي جمال :البهاق حاجة ميزة من ربنا
قام المطرب رامي جمال، من خلال حسابه الرسمي على موقع الصور الشهير «إنستجرام» بنشر فيديو له، يتحدث فيه لأول مرة عن تجربته مع مرض البهاق، قائلا «عشان الناس اللي بتسألني وبتقولي البهاق فين وخفيت إزاي؟ أنا عايز أقول إني مخفتش وأهو البهاق في إيدي أهو، وجنب شفايفي وجنب عيني وفي كل جسمي، أنا الأول لما كنت بشوف نقطة كنت براقبها وكنت بزعل أوي دلوقتي، بحس إنها ميزة لأنها خلتني أشوف حب الناس ودعمهم ليا».
وتابع «الحاجة اللي بصور الفيديو عشانها إني عايز اقول لكل أم ابنها عنده بهاق هو معندهوش مشكلة، بس إنتي لازم تربيه إنه ولد عنده ميزة، ربنا ميزه بيها، والميزة دي حاولي تقنعي كل اللي حواليه بيها».
وأضاف «أنا مغني والشكل جزء من شغلي بس بسببكوا بقيت شايف إنها ميزة. أنا لما كنت بصور بوستر ألبومي اللي هاينزل المصور بتاعي بيقولي إيدك فيها حتة باينة قولتله سيبها لأن ده مش عيب، واللي شايف ده عيب ميهمناش، إحنا يهمنا التلاتة أربعة اللي حوالينا وبيحبونا، البنت اللي بتقول أنا عندي بهاق وداخله على خطوبة أو جواز وخايفة عريسي يسيبني أنا أهو بقولك متكمليش معاه لو مش قابلك، لأن مشاكل الدنيا أكبر بكتير من شوية ألوان في جسمك. أنا بقولك متتجوزيهوش لأنك مميزة، مفيش عندك مشكلة وممكن أقولك إنه بياض قلبك بان علي جسمك».
واختتم «حبوا نعم ربنا، الألوان دي إنتوا مميزين بيها والله اللي عنده بهاق ده مميز، والله أنا بقيت سعيد جدا وإنتوا حررتوني وأسعدتوني بدعمكم».
جريدة الموجز، جريدة ورقية أسبوعية مستقلة، وموقع شامل يستطيع الجمهور من خلاله الوصول للخبر الصحيح والمعلومات الدقيقة.
ويقدم موقع الموجز للقراء كل ما يهم الشأن المصري الداخلي والخارجي بشكل يومي وعاجل، بالإضافة إلى أخر تحديثات أسعار الذهب ، أسعار العملات، أسعار الدولار، أسعار السلع أولاً بأول.
كما يقدم الموقع لقرائه أحدث وأهم أخبار الفن، وأخبار الرياضة، وأخبار السياسة، وأخبار الحوادث، وأخبار العالم ، وأهم الاحداث الكروية ، دوري أبطال أوروبا، ودوري أبطال آسيا، ودوري أبطال أفريقيا.
