تصريحات خطيرة للرئيس السيسى عن الأوضاع الداخلية وأزمة سد النهضة والملف الليبى

قال الرئيس عبد الفتاح السيسى، إن أزمة العقار المائل فى محافظة الإسكندرية، تجسد الواقع، متابعا: "القضية حجمها كبير.. والواقع بتاع العمارة دي وعمارة فيصل تجسيد للواقع اللى إحنا فيه".

وأضاف الرئيس عبد الفتاح السيسى،خلال تصريحات تلفزيونية :"لما أطلقت موضوع المصالحة ومخالفات البناء كان الهدف منه.. إحنا بنقول للناس فيه عندنا مشكلة كبيرة جدا، والمشكلة دي من ضمنها إن الدولة غايبة من سنين طويلة.. وهذا يعني إجراءات غير مسيطر عليها".

وأشار الرئيس السيسى، إلى وجود فساد إدارى وتنظيمي أدى إلى ظهور مثل هذه المشكلات فى الدولة المصرية، مردفا: "أنت النهارده عايز مليون شقة سنويا.. وعايز توفر ده فى ظل قدرة مالية محددة".

وتابع الرئيس:" إحنا داخلين على القرى ومخصصين 500 مليار جنيه للقرى، كم المطلوب ضخم والبلد مش قادرة توفره، مش المشكلة توفير المبلغ المشكلة فى الرسوم الهندسية، كل قرية ليها شغل مختلف، أنا بستفيد من فرصة البيت بتاع الإسكندرية احنا دارسين حاجتنا ومجهزين نفسنا، عندنا 100 ألف أو 200 ألف مخالفة فى الإسكندرية ومحتاجين مليون شقة، محتاج 3 إلى 4 تريليون جنيه.

وأضاف أنا أقدر أعمل لكل الأجيال القادمة كل ده، مليون شقة، نحن تجاوزنا موضوع الإيجار كفكر، الناس عاوزة تعيش فى تمليك، وما قلته عن المساكن قولته قبل كده عندنا 40 إلى 50 % عشوائيات، اليوم إحنا داخلين على الريف، المشكلة مش مشكلة توفير التمويل اللازم، فهل إحنا هننجح ونحن متحركين فى إننا نقلل حجم النمو العشوائى، حجم الطلب اللى هينطلب السنادى والسنة الجاية احنا قادرين نوفره.

وحذر الرئيس عبد الفتاح السيسى، من ظاهرة الزيادة السكانية، وقال فى حديثه للمصريين: "انتوا يا ترى منتبهين لكلامي عن النمو السكاني ليكم ولا لاء؟.. إحنا مع بعض نواجه مشكلة كبيرة.. لا أنا لوحدى.. ولا انتو لوحدكم.. إحنا مع بعض نستطيع".

وأضاف الرئيس السيسى أن قضية الزيادة السكانية منذ أيام الرئيس الراحل جمال عبد الناصر، واستمرت فى عهد الرئيسين الراحلين أنور السادات ومحمد حسنى مبارك، مردفا: "الواحد يقول أنا عندي 4 عيال مش عارف أكلهم.. صحيح أنت مش عارف تأكلهم.. طيب انتبهت وأنت بتجيب الـ4 عيال؟".

وتابع الرئيس السيسى،"لازم وإحنا بنشتغل كدولة نخلى بالنا من استقرار المجتمع.. ومش كل حاجة يتم تطبيقها مباشرة، ممكن تعمل إجراء نظرى صح لكن توقيت تطبيقه يمنع".

وأكد الرئيس السيسى، أن هناك اهتمام كبير بقضية تنظيم الأسرة خلال هذه الفترة، متابعا: "مينفعش نعمل إجراءات قانونية عنيفة دلوقتى.. تأثيرات الثورة والغضب ما زال موجود جوه الناس لحد الآن.. لم ينتهى بعد.. ولكن يجب على الناس تساعدنا إنها تتفهم أسباب ما نحن فين وإحنا ليه وصلنا لكده".

و قال الرئيس عبد الفتاح السيسي، إن الدولة تدرس كل الموضوعات الخاصة بلقاح كورونا، موضحا أن الدولة قررت ان تعطي اللقاح لـ الأطباء و كبار السن ومن يعانون من الأمراض المزمنة.

ولفت إلى أن بين 30 لـ 35 % من المواطنين كبار السن ومن يعانون من الأمراض المزمنة و من هم فى الشريحة الأولي.وأشار الرئيس أن ذلك يتطلب حوالى 70 مليون جرعة، مؤكدًا أن الأموال موجودة، ونقوم بعمل تنظيم للموضوع.

وزف الرئيس عبدالفتاح السيسي، بشرى سارة لأهالي المحافظات المختلفة، مؤكدا انه أصدر توجيهات للهيئة الهندسية للقوات المسلحة بامر مفرح لهم. 

وأضاف السيسي مساء اليوم السبت،: نعمل في مشكلة البناء العشوائي، وكلفت الهيئة الهندسية بعمل نصف مليون وحدة سكنية في المحافظات. 

وبشأن انزعاج الناس من كثرة إنشاء الكبارى فى مصر، قال الرئيس السيسى، : "أنا عايز أقول للناس هو انتو شايفين أن اللى إحنا بنعمل ده كان مطلوب ولا هو زيادة، انت عندك كام مليون عربية بتتحرك فى مصر، وكل سنة بتزيد 200 ألف، انتو متخيلين فقط هو أنا بعمل كتير فى الطرق بس، لا أنا بعمل كتير فى كل شىء فى كل القطاعات".

وتابع الرئيس قائلا: "قطاع الطرق ده مرتبط بحياتنا فى مصر، وعلشان نقلل حجم الوقت الضايع والوقود اللى بيستهلك ويضر الناس.

وبشأن سد النهضة أكد أن الدولة تخوض مفاوضات شاقة للدفاع عن الحقوق المصرية وأنه يثق فى الوصول لنتائج طيبة وشدد على أهمية تماسك المصريين وثقتهم فى ذلك مشيرا إلى أن الدولة فى ذات الوقت تعمل على تقليل الكمية المهدرة من المياه عبر مشروع تبطين الترع وكذلك زيادة عدد محطات التحلية .

وفى الشأن الليبى أكد السيسى ترحيبه بالخطوات الجديدة فى ليبيا والسلطة التنفيذية الجديدة مشيرا إلى أنه فور تشكيل الحكومة الجديدة سيتم التعاون معها لتحقيق الاستقرار فى ليبيا.